余德丞留院近1個月康復出院　Dickson：生命無take 2定好好珍惜

TVB藝人余德丞（Dickson）上月8日踢波時身體不適，突然暈倒昏迷入院送往瑪麗醫院深切治療部。余德丞入院醫院差不多1個月，直至今日（9月7日）約5時多，余德丞在個人社交平台宣佈：「我出院了！」令一眾關心Dickson的網民放下心來。

余德丞在個人IG發表長文如下：

感謝瑪麗醫院既醫生同護士們，見住你地早更完又夜更，又一大早巡房，又每日24小時留意住我既病情，真係辛苦你地！

感謝我既屋企人，每日擔心我病情既變化，又驚我唔知有咩需要，仲要每日頻頻撲撲幫我準備三餐。感謝我公司，我經理人同一班好同事，成日擔心我會鑽牛角尖亂咁唸，一得閒就開解我。

感謝我既朋友，知我一個人悶，一有空檔就嚟陪我傾計，仲要買埋生果糖水俾我食。

感謝每一位關心我既你地同支持我既 fans，係唔同既社交平台都見到有好多問候我既訊息。雖然我未能夠一一回覆，不過我絕對感受到你地既心意。

不過坦白講，原來連續咁多日面對住一樣既三面牆，加埋打唔開既窗，感覺真係好難受！所以我都希望今次之後，我既身體會生生性性，爭一口氣，唔好再令大家擔心。

醫生話短期之內唔可以做運動住，相信都會係我最唔習慣既。生命無take 2 ，今次咁好彩有多一次機會，我一定會好好珍惜。俾啲時間，等我休養多一陣，好快我就會重新出發。

帖文配一張跑步相，意味重新出發。

另外，9月2日生日的余德丞，在醫院度過29歲生日，所以他在社交平台同時附上生日蛋糕照、朋友為他打氣心意卡照片，希望Dickson快些復出跟觀眾見面。

▲ （取自余德丞facebook）